ОТА-ОНА РОЗИЛИГИ-ОЛТИНГА ТЕНГ

 
Ҳар бир инсоннинг дунёга келишига ота-она сабабчидир. Уларнинг фарзандлар устидаги хақлари жуда кўп бўлиб, Қуръони карим оятлари ва ҳадиси шарифларда бу хақда батафсил баён қилинган. Муқаддас динимизда ота-онани рози қилиш улуғ ибодат хисобланади. Қуръони каримнинг 15 та оятида айнан ота-онага яхшилик қилиш ва уларнинг ҳақларига дуода бўлиш тўғрисида зикр қилинади. Жумладан, Аллоҳ таоло ўзига ибодат қилишга буюрганидан сўнг ота-онага доимо чиройли муомала қилишни буюрган. Демак, Аллоқ таоло ўзининг розилигини ота-онанинг ризоликларига боғлаб қўйди. Бу ҳақда Пайғамбаримиз (с.а.в) шундай марҳамат қиладилар:
 “Аллоҳқ таолонинг розилиги – ота-онанинг розилигида, Унинг ғазаби эса – ота-онанинг ғазабидадир”(Имом Табароний ривояти).
 Ривоят қилишларича, Пайғамбаримиз(с.а.в)нинг ҳузурларига бир киши келиб:
 - Сизга ҳижрат ва жиҳод учун байъат қиламан, савобини Аллоҳ таолодан талаб қиламан,-деди.
 - Ота-онангдан биронтаси ҳаётми?- деб сўрадилар Пайғамбаримиз (с.а.в).
 - Ҳа, иккиси қам тирик,- деб жавоб берди у киши.
 -Ажр-савобни Аллоҳдан кутасан-а?
 - Ҳа, шундай.
 - Ундай бўлса, ота-онангнинг олдига қайтиб боргинда, уларга яхши муомала қил,- дедилар У зот. (Имом Бухорий ва Имом Муслим ривоятлари).
 Шариатимизда ота-онага яхшилик қилиш фақат улар ҳаётлик чоғида эмас, балки дунёдан ўтганларидан кейин ҳам давом этиши лозим эканлиги таъкидланган. Ота-онага яхшилик қилишнинг энг паст даражаси уларга ширин сўз айтмоқ, яхши муомала қилмоқдир.
 Орамизда ота-онага зулм қиладиган, уларга паст назар билан қарайдиган, итоат этмайдиган фарзандлар ҳам йўқ эмас. Бу жуда катта гуноҳдир. Аммо, бу ҳақиқатни ўз вақтида англаб етавермаймиз. Вояга етгач ота-она насиҳатини қулоққа олмайдиган, уларни замонадан орқада қолган, янгиликларни тушунмайдиган одам деб ўйлайдиган ёшлар талайгина. Кўпгина оилавий келишмовчиликларни кузатсангиз, ўғил ва келиннинг ота-онадан ихтиёрсиз, ўз билганича иш тутиши, уларнинг ҳурматини жойига қўймасдан дилини оғритиши каби қолатларга дуч келасиз. Албатта, бундай вазиятларда кўпгина ота-оналар кек сақлашмайди, кечиримли бўлишади. “Яхшими-ёмонми фарзандим, бир кун тушуниб қолар...” дея бағрикенглик қилишади. Аммо, муқаддас китобларда таъкидланишича, қилинаётган қар бир хатти-ҳаракатимиз ҳисоблидир. Айниқса, ота-онага қилинган зулм ва ҳурматсизликнинг жавоби оғир бўлади.
 Унутманг, ота-онангиз қеч қачон сизга ёмонлик соғинмайди, фақат яхшиликлар тилаб дуода бўладилар. Уларнинг қадрига етинг, олтинга тенг дуоларини олишга интилинг.